नेपालगन्ज ०७ भाद्र ।
बाँकेमा रासायनिक मलको चरम अभाव देखीएको छ । कृषि सामग्री केन्द्र लिमिटेडको क्षेत्रिय कार्यालय नेपालगन्जले भदौ एक गते एक साताभित्रै युरिया मल आईपुग्ने बताएपनि अहिलेसम्म मल आइपुगेको छैन् । धानखेतीको टप ड्रेसिङको समय भएकाले यतिबेला युरिया मल अभावमा छटपटाइरहेको किसानहरुले बताएका छन् ।
कम्पनीले खरिद गरेको ३० हजार मेट्रिक टन मल भारतमा अड्कििएकाले समस्या भएको कार्यालयका निमित्त प्रमुख रमेश कुमार पौडेलले बताउनुभयो । मल खरिद तथा आपूर्तिको जिम्मा पाएको कृषि सामग्री कम्पनी लिमिटेडले समयमै मल खरिद गरेपनि समयमै आपूर्तिको दायित्व पूरा नगरेको ओमकार कृषि सहकारी संस्था हिरमिनियाका अध्यक्ष विजय कुमार वर्माले बताउनुभएको छ । अब केहि दिनमै टप ड्रेसिङको समय घर्किने भएकोले मल आएपनि त्यसको उपादेयता नरहने उहाँले बताउनुभयो । कृषि सामग्री केन्द्रले खरिद गरेको मल भारतको विशाखापट्टम बन्दरगाहमा थन्किएको छ ।
कृषि सामग्रीले रेल नपाउँदा ढुवानी गर्न नसकिएको बताउने गरेको नेपालगन्ज कार्यालयका निमत्ति प्रमुख पौडेलको भनाइ छ । केहि दिनमै मल आयात हुने र किसानहरुलाई सहकारीमार्फत वितरण गरिने उहाँले बताउनुभयो । उहाँका अनुसार, तत्कालै २५०० टन भैरहवा र यति नै मात्रामा वीरगञ्जमा मल आइपुग्ने छ । बाँकी २५ हजार टन मल कहिले आउँछ भन्नेमा स्वयं लिमिटेड समेत अनविज्ञ छ ।
